ՀՊՏՀ մարզադահլիճում նոյեմբերի 20-ին ավարտվեց հանրապետական ուսանողական մարզական խաղերի ձեռքի գնդակի առաջնությունը: Մրցանակային տեղերի համար ընթացավ թեժ և լարված մրցապայքար: Առաջին հորիզոնականը զբաղեցրեց Հայաստանի պետական ճարտարագիտական համալսարանի թիմը: 2-3-րդ տեղերի համար պայքարում մեր մարզիկները, հաղթելով Երևանի պետական համալսարանի թիմին, նվաճեցին արծաթե մեդալը:
«Ուրախությամբ նշեմ, որ համալսարանի մարզական կյանքի պատմության մեջ առաջին անգամ տղաների ձեռքի գնդակի մեր հավաքականը այսքան հաջող հանդես եկավ և գրավեց երկրորդ հորիզոնականը»,- լավ խաղի համար արժանին մատուցելով մեր տղաներին և մարզիչ, դոցենտ Կառլեն Սարգսյանին` ասաց ֆիզդաստիարակության ամբիոնի վարիչ, պրոֆեսոր Լևոն Սամվելյանը:
Տեղեկացնենք` մրցաշարում հաշվարկից դուրս հանդես էր գալիս նաև ֆիզիկական կուլտուրայի հայկական պետական ինստիտուտի թիմը, որն էլ նվաճեց մրցաշարի սուպեր գավաթը:
Խաղերի ավարտից հետո տեղի ունեցավ պարգևատրման հանդիսավոր արարողություն: Մրցանակային տեղեր զբաղեցրած թիմերին մեդալներ հանձնեց գլխավոր մրցավար, ՀՀ ձեռքի գնդակի ֆեդերացիայի փոխնախագահ, ֆիզիկական կուլտուրայի հայկական պետական ինստիտուտի մարզական խաղերի ամբիոնի վարիչ Հարություն Մելքոնյանը:
