Էջեր

Վարչապետ. 21-րդ դարում հաջողության են հասնում այն երկրները, որոնք հանդես են գալիս նոր գիտելիքի ստեղծմամբ

22 Նոյեմբեր 2012

Վարչապետ Տիգրան Սարգսյանը մասնակցությամբ այսօր Հայաստանի պետական տնտեսագիտական համալսարանում մեկնարկեց «Ազգային տնտեսության մրցունակության բարձրացման հիմնախնդիրները» թեմայով 22-րդ գիտական նստաշրջանի բացմանը:

Ողջունելով գիտաժողովի մասնակիցներին՝ Տ.Սարգսյանը ներկայացրեց կառավարության կողմից իրականացվող բարեփոխումների ուղղությունները: Նրա խոսքերով՝ 21-րդ դարում հաջողության են հասնում այն երկրները, որոնք կարողանում են համաշխարհային շուկայում հանդես գալ նոր գիտելիքի ստեղծմամբ: «Ինդուստրիալ հասարակությունից անցումը պոստինդուստրիալ հասարակությանը ենթադրում է տեղափոխվել գիտելիքի ոլորտ: Որպես կառավարություն՝ մենք պարտավոր ենք մի կողմից ստեղծել գիտելիքահեն հասարակության հիմքերը, մյուս կողմից բացահայտել արդյունաբերության այն մրցունակ ճյուղերը, որոնք ունեն ապագա և կարող են ստեղծել հարաբերական առավելություններ տնտեսությունը զարգացնելու համար»,- ասաց վարչապետը:

Տ.Սարգսյանի խոսքերով՝ այդ տրամաբանության ներքո էլ մշակվել է արտահանմանն ուղղված արդյունաբերական նոր ճյուղային քաղաքականությունը, որով պետությունը պարտավորություն է ստանձնել ձևավորել ոչ միայն մրցակցային բիզնես միջավայր, այլև մասնավոր հատվածի հետ մշակել ու իրականացնել ճյուղային արդյունաբերական քաղաքականություն: «Ձևավորվել է պետություն մասնավոր համագործակցության նոր հարթակ՝ վարչապետի գլխավորությամբ, որի նպատակն է բացահայտել ՀՆԱ-ի ներուժ ունեցող արդյունաբերական տարբեր ճյուղերի առավելությունները: Համաձայնագրերի միջոցով 2-3 ճյուղերում արդեն իսկ հստակեցվել են պետության և մասնավորի պարտավորություններն ու գործողությունները: Առանձնահատկությունը կայանում է նրանում, որ ըստ ճյուղերի պետության քայլերը խիստ տարբեր են, չկան ունիվերսալ գործիքներ, որոնք կվերաբերեն բոլոր ուղղություններին»,- ընդգծեց վարչապետը:

Անդրադառնալով գյուղատնտեսության ոլորտին՝ Տիգրան Սարգսյանն ասաց, որ գործադիրը գնալու է արտադրողականության աճի և մարզերում նոր աշխատատեղերի ստեղծման ճանապարհով: Կառավարության նոր՝ գյուղատնտեսության և գյուղի զարգացման հայեցակարգի նպատակն է մարզերում ստեղծել կյանքի համար հարմարավետ պայմաններ, որպեսզի մարդիկ ստիպված չլինեն ժամանել մայրաքաղաք: Վարչապետը համայնքների և տնտեսությունների խոշորացման ծրագրերն իրականացնելու գործում ակնկալում է նաև երիտասարդ հետազոտողների ուսումնասիրությունները: 

Խոսելով սոցիալական բնագավառում պետության կողմից իրականացված բարեփոխումներից, Տ.Սարգսյանը նշեց, որ պետությունը կատարել է արմատական փոփոխություններ և գործադիրի նպատակն է պայքարել ոչ թե սոցիալական խնդիրների և աղքատություն ծնող հետևանքների, այլ դրանց պատճառների վերացման ուղղությամբ: «Աղքատություն ծնող պատճառները կրթության և աշխատատեղերի բացակայությունն են: Աղքատ ընտանիքներում կրթվածության մակարդակը շատ ցածր է, քանի որ կրթությունը հասանելի չէ: Այսուհետ վերջիններիս կրթության ծախսերը պետությունը վերցնելու է իր վրա և աղքատությունը չպետք է պատճառ հանդիսանա, որպեսզի սոցիալապես անապահով ընտանիքների երիտասարդները կրթություն չստանան: Դրանով պայմանավորված էլ 2013թ-ի պետական բյուջեի ֆինանսական միջոցների վերաբաշխումը կատարել ենք հօգուտ այս ռազմավարության: Լրացուցիչ միջոցներն ուղղելու ենք կրթական ծրագրերի իրականացմանը, առաջին հերթին աղքատ ընտանիքների համար»,- ասաց Տ. Սարգսյանը:
Վարչապետի խոսքերով՝ հաջորդ խնդիրը սոցիալապես խոցելի ընտանիքների աշխատունակ անձանց աշխատանքով ապահովելն է: Կառավարության ղեկավարը նշել է, որ այս առումով բարդ հոգեբանական իրավիճակ է ստեղծվել: Ըստ նրա՝ անապահով ընտանիքների աշխատունակ անձինք պատրաստ չեն աշխատել, չնայած որ ներկայիս 30-50 հազար դրամ սոցիալական նպաստի դիմաց կկարողանան վաստակել 90-120 հազար դրամ: «Պետք է հաղթահարենք այս հոբգեբանական բարդույթը, որպեսզի մարդն իր աշխատանքով ապահովի իր ընտանիքի կենսունակությունը»,- նշեց Տ.Սարգսյանը:

Խոսելով առողջապահության ոլորտում իրանցվող ծրագրերի վերաբերյալ՝ վարչապետը հայտնեց, որ այստեղ առկա ֆինանսավորման մոդելը չի բավարարում: Ստեղծվել է աշխատանքային խումբ և Մեծ Բրիտանիայի առողջապահության նախկին նախարար Արա Դարզիի օժանդակությամբ մշակվում է այս բնագավառի արդյունավետությունը բարձրացնող նոր ռազմավարություն: Ըստ վարչապետի՝ խնդիրը ֆինանսավորման բարձրացման մեջ չէ, այլ կազմակերպական ճիշտ եղանակների մշակման: «Այստեղ առաջին քայլն ապահովագրական համակարգի ներդրումն էր: 114 հազար պետական ծառայողներ հնարավորություն են ստացել ապահովագրել իրենց առողջությունը, ներառյալ սրտի վիրահատությունը, որը նախկինում շատերի համար անհասանելի էր: 2013 թ. պետբյուջեով 30 հազարով ավելացրել ենք այն պետական ծառայողների թիվը, որոնք կկարողանան օգտվել այս ծառայությունից: Մեր նպատակն է առողջապահության ոլորտում դուրս գալ ճիշտ գնագոյացման վրա, քանի որ այստեղ էլ առկա է հիմնական խնդիրը»,- նշեց Տ. Սարգսյանը:

Անդրադառնալով կրթությաւն և գիտության ոլորտին՝ վարչապետն ասաց, որ այստեղ ընտրվել է զարգացման հեռանկարային մոդել: Գիտության և կրթության զարգացման հիմքը պետք է լինեն համալսարանները: «Մրցունակ լինելը պայմանավորված է կրթական մակարդակով: Համալսարանները պետք է ապահովեն գիտության և արտադրության միջև կապը՝ լինելով լրջագույն հետազոտական կենտրոններ: Բոլոր դասախոսներն անպայման պետք է զբաղվեն գիտությամբ, դրա մասին է վկայում լավագույն փորձը: Բուհերը պետք է հանդիսանան հասարակության հենքը և մեր քայլերն ուղղվելու են այդ նպատակի իրականացմանը»,- ընդգծեց Տ.Սարգսյանը:

Աղբյուր` Panorama.am