Էջեր

Մաքսային եւ հարկային նոր լսարաններ՝ տնտեսագիտականում

13 Ապրիլ 2012

Այսօր Հայաստանի պետական տնտեսագիտական համալսարանի ֆինանսական ֆակուլտետում տեղի ունեցավ ՀՀ պետական եկամուտների կոմիտեի հովանավորությամբ հիմնանորոգված եւ ժամանակակից տեխնոլոգիաներով հագեցած՝ մաքսային մասնագիտացված երեք լսարանների բացումը: Համատեղ կրթական ծրագրերի իրականացման եւ ՊԵԿ նախագահի կողմից ցուցաբերած նյութատեխնիկական աջակցության համար համալսարանի ռեկտորատի կողմից ՊԵԿ նախագահ Գագիկ Խաչատրյանին շնորհվեց «ԵՊՏՀ բարեկամ» պատվավոր կոչումը:

Իր ելույթում ԵՊՏՀ ռեկտոր Կորյուն Աթոյանը նշեց, որ բուհում սկսված կրթական բարեփոխումները ոչ թե նպատակ են, այլ միջոց՝ ուղղված կրթության որակի բարձրացմանը եւ տնտեսության ոլորտում մասնագետների պատրաստմանը. «Բարձրակարգ տնտեսագետը տեսնում է ոչ միայն ներկան, այլեւ կերտում իր երկրի ապագան: Ինչպես ասել է ամերիկացի տնտեսագետ Պոլ Հեյնեն, կանխատեսելով ապագան` մենք փոխում ենք այն, քանի որ ապագան ստեղծող մարդիկ «կարդում» են մեր կանխատեսումները»,- նշեց ռեկտորը: Նա հավելեց, որ աշխարհի արագընթաց զարգացմանը զուգահեռ` պետությունների առջեւ դրվում են նոր մարտահրավերներ. «Անցյալի փորձը հուշում է, որ դրանք իրենց հետ բերում են նաեւ նոր հնարավորություններ, որոնցից օգտվելով` ապահովում ենք նոր որակի կրթություն եւ գիտություն»:

Նշենք, որ 2011թ. սեպտեմբերին վավերացված ՀՊՏՀ-ՊԵԿ համագործակցության պայմանագրով բուհում սկիզբ էր դրվել մագիստրոսական նոր ծրագրերի իրականացմանը: Արդյունքում, ֆինանսական ֆակուլտետի 210, 211, 212 լսարաններն այսուհետ կծառայեն որպես մաքսային եւ հարկային մասնագիտացված լսարաններ:

aravot.am